Suni Sunai Adalat : Samaj Ki Judgemental Soch

 

A scale of justice representing a judgmental society, contrasting a critical crowd with negative placards on the left against independent youth holding positive signs like 'FREEDOM TO CHOOSE' on the right, featured on the poetry blog Ehsaas by Swati.



Namaste/ Hello doston!


Humne ye aksar dekha hain ki samaj mein log apni soch kam rakhte hain aur doosron ki suni-sunai baaton par bharosa zyada karte hai. Kisi ko chand minutes dekh kar ya sun kar, uski poori zindagi ko judge kar lena jaise logon ki aadat mein shumar ho chuka hai.

Isi judgemental soch par maine kuch lines likhne ki koshish ki hai, aur mujhe poora yaqeen hai ki aisa anubhav kabhi na kabhi aap sabhi ne apni zindagi mein zaroor kiya hoga...


Kahan se log aksar aisi baate laate hain,

Bina dekhe-jaane kisi ko, apne nazariye banate hain...

Sunkar bas, kisi ke kirdar par ungli uthate hain,

Phir yeh kisse har mehfil mein kuch yun batate hain...


Ki saas-sasur se alag hui, toh zaroor bahu hi galat hogi...

Chhote kapde pehnti hai, toh pakka slut hogi...

Der raat lauti, toh purusho se sambandh honge,

Apne samman mein kuch boli, toh sanskar kam honge...


Fati jeans aur kaan mein baali pehnata hai...

Yeh aawara hai, pakka ladkiyon ko chhedta hai...

Biwi ka saath deta hai, ban gaya joru ka gulam hai...

Khud ke liye bola jo beta, yeh bhoola maa-baap ka samman hai...


Yeh log bina gawaah aur sabooton ke adalat lagate hain,

Bevajah kisi ke baare mein apne faisle sunate hain...

Bhool jaate hain aksar yeh, ki unki safed chadar par bhi kitne daag hain,

Doosron ke baare mein kehte hain aur khud ke karam kharab hain...


Kash log kisi ke baare mein kehne se pehle apne shabdon par dhyan dein,

Suni-sunai baaton par judge na karke, pehle khud ko jaan lein...


Kaise bhool jaate hain ye, ki inn logon ke liye bhi doosron ke paas patthar hain,

Aur khud inka bhi toh sheeshe ka makaan hai...

Thoda apni kamiyan door karo, khud ko behtar banao,

Waise auron ke liye toh sabke paas mufat ka gyan hai...



Kya aapne bhi kabhi yeh cheezein face ki hain, ya aap bhi kabhi aise daur se guzre hain? Mujhe comment karke zaroor batana!



Meri Kuch Aur Kavitaayein:

Agar aapne meri pichhli kavita 'Zindagi Ka Chakravyuh' abhi tak nahi padhi hai, toh aap yahan dono parts padh sakte hain:

[Zindagi Ka Chakravyuh: Part 1](https://www.ehsaasbyswati.com/2026/05/zindagi-ka-chakravyuh-part-1-insaaniyat.html)

[Zindagi Ka Chakravyuh: Part 2](https://www.ehsaasbyswati.com/2026/05/zindagi-ka-chakravyuh-part-2-rishte-aur-nizaam.html)



Kuch naye ehsaas likhne ki koshish mein...

Aapki Swati...


Comments

Post a Comment

Popular posts from this blog

Ehsaas ka Safar: Meri Pehli Shuruat

Image
Namaste/Hello doston! ​Mera naam Swati hai, aur aaj se main ek naya safar shuru kar rahi hoon—jiska naam hai " Ehsaas by Swati " . ​Hum sabki zindagi mein bahut kuch aisa hota hai jo hum keh nahi paate, lekin mehsoos zaroor karte hain. Kabhi koi purani yaad dil ko udas kar deti hai, toh kabhi koi nayi umeed jeene ka hausla deti hai. Main hamesha se apne jazbaat ko kagaz par utarna pasand karti hoon, aur aaj is blog ke zariye, main apne wahi Ehsaas aap sab tak pahunchana chahti hoon. ​Is blog par aapko milega: ​ Sad & Soulful Poetry: Mere dil ki gehraiyon se nikle alfaaz. ​ Life & Motivation: Wo baatein jo humein har haal mein aage badhna sikhati hain. ​ Sachaai : Zindagi ke anubhav (experiences) jo shayad aapki kahani se bhi milte-julte ho Aaj ki meri ye shuruat unhi ehsaas ke naam hai: Jo shabd meri diary tak seemit they, Vo aaj ek naya jahan banane nikle hain. Zindagi ke mere khatte-mithe anubhav sabko batane nikle hain. Kuch saadgi mein rehte hue, Sanj...
Read more

Tera Haq Hai Sirf Tujhpe! | Motivational Poetry

Image
Namaskar doston, Kya aapko bhi hmesha aisa lagta hai ki agar humne ye kaam kiya to log kya kahenge ? Ya aapne khud ko unn bandisho me jakda hua hai jisme kaid mehsoos hoti hai? Zindagi ko aksar hum ek mushkil jung samajh lete hain...lekin asli mushkil hamare andar ka dar hota hai. Aaj ki ye meri poetry un sabhi ke naam jo apne dar ko darana chahte hai, usay harana chahte hai... Maana ye jivan nahi ek jung hai... Par tere hosle bhi to buland hai! Kyu darta hai ae mere dil kisi se, Kuch to log kahenge, bas tera ye bhram hai... Tod de un bandishon ko jisne tujhe hai bandha, Jee le un khwahishon ko jo poori karna tu chahta. Mout se bada to kuch nahi, phir kisi se bhi kya darna... Tera haq hai sirf tujhpe, tu isay vyarth soch mein kyu ganwata? Maine ye lines isiliye likhi hai ki aksar hum apni zindagi ki bagdor dusro k haath me de dete hain aur fir bs chinta or hatasha ke sath sari umar guzar dete hai. Yaad rakhiye aapki zindagi aur khwahishen bas aapki hai, isay muskurate hue bitayein. Aap...
Read more

Durga Ashtami Par Maa ke Charno Mein Ek Arzi

Image
Hey Janani Jagdamba, Kuch aisa karne lag jaaun, Bas dhyan teri bhakti mein rama rahe, Iss jag ki na main parwah rakhun, Bas mann tere naam ko japa kare. Ye janam tune diya hai Maa, Is jeevan ka mujhe moh nahi, Tere charno ki ek dhool ban paaun, Itne achhe mere karam nahi. Aashirwad do Maa mujhe ki, Kabhi kisi ke kaam aaun, Phir is nashwarta ko chhod kar, Teri god me main so jaun... " Aap sabhi ko Durga Ashtami ki dheron shubhkaamnayein! Maa Durga aapki zindagi se saare andhere mita dein aur aapko himmat aur khushi dein... Jai Mata Di!"🙏 Mera next post yahan padhein: https://www.ehsaasbyswati.com/2026/03/tera-haq-hai-sirf-tujhpe-motivational.html Kuch naye ehsaas likhne ki koshish mein... Aapki Swati...
Read more