Bhookh, Bachpan aur Hum

Namaste/ hello doston!

Kya aapne kabhi socha hai ki ek sadak par hone wala chhota sa waqiya kisi ke poore din ke sukoon ko khatam kar sakta hai? Aaj ki ye kavita mere usi safar ka ek hissa hai.

Gaadi ki khidki se jhaakti, meri ye do aankhein,

Door talak jinhe koi apna nazar nahi aata.

Thahar gayi achanak se sadak ke dusri or,

Uss bachhe ka rodan sunkar...

Jo shayad zid kar raha tha apni maa se, kuch khana dilane ki.

Woh maa, jo ek maili-kuchli saree mein lipti thi,

Bikhre par bandhe hue uske baal...

Bhookh se dono behaal.

Kuch madad paane ko, 

Apna katora, gaadiyon ke aage rakh rahi thi,

Aur apni bebasi ko sametne ki koshish kar rahi thi.

Woh bachha, jo ab tak ro raha tha,

Vo bhi ab jaan gaya hai shayad 

Maa ki laachari aur garibi...

Usne achanak se rona chhod diya,

Dikhane laga kalabaaziyan...

Apni bhookh mitane ko,

Usne bahut jaldi seekh liya tha...

Arey dekho zara, uska to sahi se bachpan bhi nahi shuru hua tha!

Achanak piche se aawaaz aayi—

"Arey, tum bhavuk nahi ho jaana,

Ye inka logon ko thagne ka hai bahaana."

Gaadi aage badh gayi, par mann wahin atak gaya...

Insaan ko milte hain kyun itne dhokhe,

Ki woh insaniyat se hi bhatak gaya ?

Yeh kavita mere safar ke dauran dekhe gaye ek scene se nikla hua sawaal hai. Ek aisa sawaal, jiska jawab main aaj bhi dhoondh rahi hoon...Kya baar-baar milne wale dhokhe waqai insaan ko insaniyat se door kar dete hain?

Aapka is baare mein kya kehna hai? Kya humein har aansu ko ek 'drama' samajhna chahiye, ya ab bhi humein insaniyat par bharosa rakhna chahiye? Apne vichar comment section mein zaroor share karein.

Mental peace ka sambandh aksar humari aas-paas ki duniya se hota hai. Padhiye is par mera article- Mental Health aur Parivar: Kya hum sach mein badle hain?

Kuch naye ehsaas likhne ki koshish mein...

Aapki Swati...